|
راس السنه
 بقلم: شفيق بطرس
24 كيهك 1726 للشهداء - 2 يناير 2010
ميلادية
راحت سنه
وجَت سنه وادينا باقينا فى راس السنه وسنه بتجرى وراها سنيين وإحنا
لِسه عليها عايشيين أوقات تلاقى القلب إنشَرَح وباقى العمر متجرحين
وساعات عيون تدمع بفرح وليالى طويله وجع وأنين أيامنا تجرى واحنا بيها
مش داريين وجرى الزمان ، وماعدنا صُغييرين نبقى اصحاب عِيال وهموم
أجيال وأجيال علينا جايين مدارس وظايف خطوبه جواز ونبقى جدود لأحفادنا
شايليين وترمح بينا يا زمان رمح الرهوان واحنا برضك غَفلانيين وساعة
الحق لما تيجى ...بنقابلها بوشوش مبوذيين بعيون مقفليين وجريت بينا يا
زمان ، وسرقتنا راح الشباب واترمينا مهدودين دابُم يابوى العَضمتين
والكِتف إنهَدل والضهر انقَطم نُصيين نَخر الوجع فى الكِيعان واتلخلخت
يابوى الرُكبتين قَصَب السِيقان عاد مسَوَس وما قادراشى تحملنا رجليين
حتى وشوش الصبايا اتكرمشت بَصَم الزمان تحت كل عينتيين نُقعد نِقّلِب
فى صور زمان ونقول هاتيجى يازمان تانى منيين نِكابر ونعمل مِش عارفين
ونقول دا لسه أيامنا جايين
ها نِكَدَب عيون الخلايق والا عيونا للمرايه ، هما إللى عادو مِكَدبيين
وسنه بتجرى وراها سنيين ولسه يابوى عليها عايشيين ولَفة كحكه وبتجرى
السنه وادينا بقينا فى راس السنه *******
وآدى العيال اللى قال عشيه يادوبك ماكانوا ياناس رُضعان صبحوا شباب
ياولداه عرايس ماشألله وعرسان جريت بيهم وبينا يازمان وماعادوا عيال زى
ما كان كبروا البنات ونسيوا باربى العروسه أم خمسميت فُستان والولاد
نسيو النبله والبندقيه والدبابه والقطر والحصان بيناموا ويصحوا ع
الكمبيوتر وفى العلب شالوا الأتارى والباكمان اللى منهم عِرِف خلاص
طريقه واللى نسى ، واللى حتى كِرِه النسيان اللى منهم تِعَقَلُه
الملايكه واللى يُنخُص ف ودانه مليون شيطان الكُل بيجرى مطروش، زى باقى
المطروشين مربوط فى الساقيه بحِلقآن
وسنيين بتجرى ووراها سنيين وإحنا لِسه عليها عايشيين ولفة كحكه وبتجرى
السنه وآدينا بقينا فى راس السنه *******
فى راس السنه سهرانيين والكُل بيحسب حِساباته أللى إنكَسَب واللى
إنخَسَر وقَد إيه جَمَع وقَد إيه فاته وأبو جِديد جايب كمان جِديد ومش
حامدُه على الآفاته وصاحب القديم مبسوط وسعيد راضى ومقضياه خَلَقاتُه
وفات الزمان وزى ماقالوا زمان وجُحا قاعد يعِد غَنَماته آدى واحد وطول
عُمره واحد وحدانى عايش فى دنياته ودا إللى ماعِندوش وداللى عِنده
وكتيره صُبيانه وبناته وواحد يترجى وجه رَب كريم يُطلب وريث له بعد
مَماته وده إللى ينَكد على مُدريه والتانى تنكد عليه حماته
وسنيين بتجرى وراها سنين وإحنا لسه عليها عايشيين ولفة كحكه وتمر السنه
وتلاقينا فى راس السنه *******
راس السنه فى نفس المكان نفس الزمان ، نفس الميعاد أهو يوم يمر زى
الأيام ويقولوا عليه راس الأعياد كل الناس على بعض تهنى على اللى جاى
وال راح وماينعاد نفس الشِله على بعض إتلَموا نفس الأسامى، لكن تتغير
الأجساد اللى إتمَرَض واللى شِفى من مرض واللى فى رجيم واللى وزنه زاد
واللى شعر راسه خلاص إتنحَل والشايب بقى أكتر من السواد عرسان عشيه
قِبلوا الهديه وصبحت أب يا أبو الأولاد بُكرَه هايجى عليك يوم وتبقى
مثل مابقينا كده أجداد ساقيه ولازم عليها بنِدور رضينا ولاركب دماغنا
العِناد وساعة الزمن ما بتقف على إللى راح وجرح الفؤاد من حِزنوا عشيه،
النهارده فِرحوا واللى فِرحوا داقوا مُر البِعاد بميزان عداله رب الكون
بيوزن ولا ينظلم يوم عبد من العِباد
وسنيين بتجرى وراها سنيين ونرجع تانى وتانى قايليين دى لفة كحكه وتيجى
السنه وآدى احنا بقينا فى راس السنه
*******
------------------------------------------------
مقالات
الكاتب
|
